Thursday, October 11, 2007

Wilujeng Boboran Siam 1428 H

Teu karaos, Romadon alias sasih siam tos ampir lekasan. Sasasih campleng urang sami-sami ngalakonan ritual saum. Sanes mung saukur nahan lapar sareng halabhab, nanging oge ihtiar sangkan naon rupi anu ku urang dipilampah henteu gaplah. Hartosna, sasih siam dianggo minangka tempat meuseuh diri supados ajen inajen diri langkung ngaronjat.
 
Lir ibarat anu sakola, tangtos saparantos lulus kedah langkung pinter ti sateuacanna. Upami kualitas atanapi ajen diri urang sateuacan sasih siam mung ukur 50, tangtos satutasna ngalakonan ibadah saum, kedang ngaronjat, langkung ti 50. Upami angger, komo upami janten nyirorot mah, tangtos eta teh janten ciciren yen ibadah saum urang teh gaplah, mung ukur dugi kana tahap 'nyiksa karep', nahan lapar sareng halabhab.
 
Kantenan kanggo anu lulus 'ujian' Romadon, dinten Boboran Siam (Lebaran) kedah dijantenkeun momen syukuran kana sagala rupi upaya urang dina enggoning ngaronjatkeun ajen inajen diri sangkan janten jalmi anu salawasna ihtiar ngahontal kasampurnaan.
 
Dintenan Boboran Siam oge dijantenkeun ajang ngaraketkeun silaturahim di papada urang, sakantenan silih lubarkeun tina sagala kalepatan tur kaluluputan. Dina raraga ieu pisan sim kuring nyanggakeun panglayad sakantenan ngedalkeun paneda, sih hapuntenna anu kasuhun, bilih aya cariosan anu matak nyugak kana manah, mugia ulah janten rengat galih.
 
Kanggo kagegelan, mangga nyanggakeun Kartu Lebaran minangka wawakil pribadi sim kuring kanggo sadayana anu ngaraos midulur, janten baraya, sok sanaos mung ukur ngalangkungan ramat komunikasi anu disebat internet. Kartu Lebaran eksklusif basa Sunda tiasa diundeur di dieu.
 
Sakali deui, wilujeng boboran siam. Taqobalallohu minna wa minkum.

10 comments:

liezmaya said...

Wilujeung boboran shiam...keun w ah telat ge hehe
hapunteun samudaya kalepatan simkuring :)

Islamuna said...

Kang Tata kamana wae yeuh? suwung tulisan :D

Tata said...

Wilujeng boboran siam, Liez.. Komo waleranana mah langkung telat :-)

Tata said...

Duh, punten, nuju teu kasiwer :-) Ke insya Allah, sasih payun urang kutrat-kotret deui..

Dede Somantri said...

Hapunten samudaya kalepatan.

salma_ns said...

Assalaamu 'alaikum...
Haturnuhun parantos sumping ka "rorompok"... =)

Tata said...

Sami-sami Kang Dede, urang silih lubarkeun, wios telat oge nya..

Anonymous said...

Wa'alaikum salam...
Sami-sami, Salma.. Nuhun dilinggihan..

Anonymous said...

Asalamualaikum.............

tipayun nepang abdi enung
kang,te2h sadaya simkuring tiasa ngiringan rumojong teu?

Tata said...

Mangga ka lebet geulis, di dieu mah resep seueur wargi geura ...